【母親節】「想過同佢一齊死」罕病兒媽媽努力走出抑鬱
「我曾經有諗過了結咗自己同埋仔仔嘅生命」，話到此處，Zoe的眼眶又不住地積滿了淚水。11年前，兒子軒軒出生，是Zoe人生的轉捩點，本是開心地迎接新生命的到來，兒子卻遺傳了父親的罕有病，1歲多時確診患上了結節性硬化症，一種罕見的多系統先天性疾病，不同的器官都會出現腫瘤，「好似佢個腦都會受到影響」。每次看到兒子因發病而抽筋，Zoe都覺得很心痛，到了上幼稚園，軒軒又被診斷患有自閉症。
大約在6年前，軒軒準備升讀小學，Zoe的精神壓力忍不住瀕臨「爆煲」的狀態。當了6年的全職媽媽，除了要照顧兒子，也同時要照顧患病的前夫，「其實我一個人照顧唔到咁多，個時自己情緒好低落，又覺得無咩嘢可以俾到個仔，唔知點算好」。這一年，她與前夫離了婚，心裏卻一直感到內疚，「覺得我欠咗佢」，內疚感徘徊不散，獨力照顧兒子的負擔一直積壓下來，不足為外人道，終於有一天，Zoe無法承受生活上帶給她的重擔，想到尋死，「我望住軒軒，喺度諗如果我去咗，剩返佢一個人喺呢個世界，邊個會照顧佢呢？」念及此處，腦海裏閃出了這樣的念頭︰不如帶埋佢去。
事後回想這段經歷，Zoe仍然感到後悔及自責，「個生命係我帶俾佢，我無權咁樣帶走佢，點解我竟然會諗到要去傷害佢？如果再嚟一次，我一定唔會咁樣諗」。還未有自殘及傷害兒子的行動之前，她就撥了一通電話給老師，告訴老師自己的狀態不太妥當，讓學校接了兒子上學後，Zoe亦被社工送進了醫院去，那時才知道自己患上了抑鬱症，「但我以前一直都唔肯接受，唔明點解情緒會有病。」
自此，兩母子開始了分隔的生活，至今已6年。Zoe仍然留在現居的房子，而軒軒則被送到兒童之家，每逢周末及假期，Zoe便會把兒子接回家中，短暫地相處，無法時刻地見證着他的成長，就像借回來的時光，一點一滴都格外珍惜，「其實都有種俾人搶咗個仔嘅感覺，但都無辦法，佢哋驚我會傷害佢」。分別的時候，Zoe會告訴軒軒，媽媽和他都要各自努力，「媽咪都會努力咁樣令自己嘅情緒病好返，第時就會可以喺返埋一齊」。
Zoe說，幾乎每次的分別，都是充滿無限的不捨，「個仔都會好唔開心，因為佢好鍾意媽咪，都好想同媽咪玩」，回憶起最初，每次重逢，軒軒都會抱着她，然後說聲「媽咪我好掛住你」。每次聽到，Zoe心裏都會覺得甜絲絲，「佢其實好錫媽咪架」。
為了日後的團圓，Zoe意識到，自己應該要有能力照顧軒軒，一方面，她接受了自己的抑鬱症，並尋求方法令日常生活可以回到軌道裡，「無再自己停藥，同埋我本身係好鍾意車嘢（縫紉），喺其他人既鼓勵之下，就開始賣自己整嘅布袋出去」。房子一角，擺放了一部縫紉機，以及各式各樣的碎布，這是Zoe小小的工作室，重建了自信，也為她尋回了生存的動力與勇氣，「搵到自己鍾意嘅嘢，同埋可以用嚟維生」，她期待，有那麼一天，可以與兒子過回一家兩口的生活，就像現時在房子裏，偶爾一起對戰網上桌球遊戲，有時是她在縫紉而兒子在看電視，如此平凡不過。
然而，想到兒子的健康，她總是很擔心，但深明當下並無法逆轉，「對於佢，我無乜嘢盼望，剩係希望佢將來可以身體健康，呢個係我最大嘅心願」。
